Judg 4 | NdeIBE | STEP | Emva kokuba u-Ehudi esefile abako-Israyeli baphinda benza okubi emehlweni kaJehova.

Judges 4

UDibhora

1 Emva kokuba u-Ehudi esefile abako-Israyeli baphinda benza okubi emehlweni kaJehova.

2 Ngakho uJehova wabanikela ezandleni zikaJabhini, inkosi yaseKhenani, owayebusa eHazori. Umlawuli webutho lakhe wayenguSisera, owayehlala eHaroshethi Hagoyimi. 3 Ngokuba wayelezinqola zempi ezensimbi ezingamakhulu aficamunye njalo ecindezele abako-Israyeli kabuhlungu okweminyaka engamatshumi amabili, bacela usizo kuJehova.

4 Ngalesosikhathi u-Israyeli wayekhokhelwa nguDibhora umphrofethikazi, umkaLaphidothi.

5 Wayethonisela amacala ngaphansi kweLala likaDibhora phakathi kweRama leBhetheli elizweni lezintaba lako-Efrayimi, njalo abantu bako-Israyeli baya kuye ukuba kwenziwe izinqumo ngemibono yabo. 6 Wabiza uBharakhi indodana ka-Abhinowami waseKhedeshi koNafthali wathi kuye, “UJehova uNkulunkulu ka-Israyeli, uyakulaya uthi: ‘Suka, uhambe labantu bakoNafthali labakoZebhuluni abayizinkulungwane ezilitshumi ubakhokhelele eNtabeni iThabhori. 7 Ngizahugela uSisera, umlawuli webutho likaJabhini, lezinqola zakhe zempi kanye lamabutho emfuleni uKhishoni ngimnikele ezandleni zakho.’ ”

8 UBharakhi wathi kuye, “Uma uhamba lami, ngizahamba; kodwa uma ungahambi lami, kangiyikuhamba.”

9 UDibhora wathi, “Kulungile, ngizahamba lawe. Kodwa ngenxa yendlela oqhuba ngayo lokhu udumo kaluyikuba ngolwakho, ngoba uJehova uzanikela uSisera kowesifazana.” Ngakho uDibhora wahamba loBharakhi eKhedeshi 10 lapho abizela khona uZebhuluni loNafthali. Abantu abayizinkulungwane ezilitshumi bamlandela, kwathi uDibhora laye wahamba laye.

11 Ngalesosikhathi uHebheri umKheni wayewatshiyile amanye amaKheni, izizukulwana zikaHobhabhi, uyisezala kaMosi, wamisa ithente lakhe phansi kwesihlahla esikhulu eZananimi eduze leKhedeshi.

12 Kwathi uSisera sebemtshelile ukuthi uBharakhi indodana ka-Abhinowami wayeseye eNtabeni iThabhori, 13 uSisera waqoqela ndawonye izinqola zakhe zempi ezensimbi ezingamakhulu aficamunye lawo wonke amadoda ayelaye, kusukela eHaroshethi Hagoyimi kusiya emfuleni uKhishoni.

14 UDibhora wasesithi kuBharakhi, “Hamba! Lolu yilo usuku uJehova anikele ngalo uSisera ezandleni zakho. Kanti uJehova kahambanga phambi kwakho na?” Ngakho uBharakhi wehlela eNtabeni iThabhori elandelwa ngabantu abayizinkulungwane ezilitshumi.

15 UBharakhi wathi esesondela uJehova wamhlasela uSisera lezinqola zakhe zonke zempi kanye lebutho ngenkemba, njalo uSisera watshiya izinqola zakhe zempi wabaleka ngezinyawo. 16 Kodwa uBharakhi waxotshana lezinqola zempi lebutho waze wafika eHaroshethi Hagoyimi. Wonke amabutho kaSisera abulawa ngenkemba, akukho muntu owasilayo.

17 Kodwa uSisera wabaleka ngezinyawo waze wayafika ethenteni likaJayeli, umkaHebheri umKheni, ngoba kwakulobudlelwane obuhle phakathi kukaJabhini inkosi yaseHazori lomndeni kaHebheri umKheni.

18 UJayeli waphuma wahlangabeza uSisera wasesithi kuye, “Woza nkosi yami, ngena phakathi sibili. Ungesabi.” Ngakho uSisera wangena ethenteni likaJayeli, wasemembesa ngengubo.

19 Wasesithi, “Ngomile. Ake unginathise.” Wavula umxhaka wesikhumba sochago, wamnathisa, wasemembesa.

20 USisera wasesithi, “Mana emnyango wethente. Kungaba lomuntu ofika akubuze athi, ‘Kulomuntu lapha na?’ wothi ‘Hatshi.’ ”

21 Kodwa uJayeli, umkaHebheri, wathatha isikhonkwane sethente lesando wanyonyobela kuye ephakathi kobuthongo obukhulu, ediniwe. Wabethela isikhonkwane enhlafunweni sangena saze sayafika emhlabathini, wafa.

22 UBharakhi wafika exotshana loSisera, uJayeli waphuma wayamhlangabeza. Wathi, “Woza, ngizakutshengisa umuntu omdingayo.” Ngakho wangena laye khonapho, nango uSisera elele isikhonkwane sethente singene satshona enhlafunweni yakhe esefile.

23 Ngalolosuku uNkulunkulu wamnqoba uJabhini, inkosi yamaKhenani, phambi kwama-Israyeli. 24 Amandla ama-Israyeli okumelana loJabhini inkosi yamaKhenani akhula, aze amchitha.